حجازيات :::<> ابو فتحيه يشتكي <>:::

حجازيات :::<> ابو فتحيه يشتكي <>:::
ليلة رمضان
(( من مقال فتحي حلواني بعكاظ نقلت لكم هذه المحاورة الجميلة ))
كنت قاعد في الصالة و شوية جتني ام فتحيه وقالتلي :
ايشبك زعلان وشايل الدنيا على راسك ؟!
لا زعلان ولا حاجة .. بس رمضان على الأبواب و الدنيا حتنقلب في البيوت قلب .. كل بيت يبغى مقاضي وعازات و الشوارع حتنزحم من كتر السيارات الرايحة و الجاية على الأسواق .
بس هادي عادة الناس يا ابو فتحيه في رمضان
بلا عادة بلا كلام فاضي .. ايش المانع انه الواحد يشتري الشئ اللي يبغاه وبعقل من غير تبذير واسراف لكن انتو يا حريم من يوم ما يقرب رمضان الا وتجيبو لنا الجنان كانكم ما تاكلوا ولا تشربوا الا في رمضان . فيه عوايل في البلد ماهي لاقية لا تاكل ولا تشرب .
الحرمة منكم تاخذ ليستة المقاضي وزوجها وراها ويجي نازل على السوق والا على المراكز التجارية المنتشرة في البلد زي الدود واللي دعاياتها في كل صفحة من صفحات الجرايد وكله ضحك على الدقوووون ..
وهاتي لف لفة ودوران في المركز وما يخرجو منه الا بكم عربية و ما يدري اخينا انه نص هاذي المقاضي حتترمي في الزبالة :::حرااام حراام هاذا الاسراف اللي بنشوفه ونسمع عنه كل سنة في رمضان .. وكله كوووم وهادا اللي حتسمعيه كمان كوووم تاني ...
في بعض الناس الله يهديهم لما تكووون عنده عزومة فطور تشوف السفرة مليانة من كل نووع من انواع الاكل و الشرب و من كثر الصحووون منت شايف شكل ولوووون السفرة من كثر الصحون المرصوصة عليها وبعدين ما يتاكل من هادا الهيلمان كله الا حبة سمبوسة وكم حبة تمرة وكم لقمة فووووول وملعقة شربة وملعقة سقدانة (( يشبه المهلبية )) ... ياهوووووه يا ناس عمره ماكان رمضان للاكل و الشرب رمضان للعبادة وقراءة القرآن !!
لا ازيدك كمان من يوم ما يجي رمضان تشوفي القنوات الفضائية تتسابق عشان تعرض مسلسلاتها وافلامها ومسابقاتها والجرايد مليانة من كثر اعلاناتها على هادي البرامج التافهة و الهابطة ما تقرا في الجرايد الا كلمة قريبا .. قريبا على شاشاتنا في رمضان .. وغير كذا المقابلات مع الفنانين و الفنانات و الراقصين و الراقصات وبعدين انا ابغى افهم هذولا ما يعروفوا ياخذوا اجازة على الاقل في رمضان ويرحمونا من لعلعة حناجرهم ومن هز خصورهم .
يا اصحاب هاذي القنوات ارحمونا شوية من هاذي البلاوي و الافلام و المسلسلات اللي ما وراها الا فساد روحانية الشهر الفضيل
وبعدين تعالي قوليلي ايش هاذي الورقة اللي في يدك لا تكون ورقة المقاضي
ارتبكت الولية وقالتلي :
ها ..... لا ..لا ..لا يا سيدي لا ورقة مقاضي ولا حاجة .. هادي ورقة كنت بالعب انا وفتحيه لعبة حيوان –انسان-جماد ورمضان كريم يا ابوووو فتحيه!!